Original: Steve Goodman - City Of New Orleans
Pfälzer Text: Christian Marquardt
Ich geh im Urlaub gern als mol uf Reise,
lern Mensche kenne aus de ganze Welt.
Die lewen uf ihr ganz eigeni Weise.
Un was ma dort bei denne als bestellt!
In Frankreich, do gibt’s rote Woi,
un s’derf a gern Champagner soi.
Do wär moi Geld wahrscheinlich ganz schnell aus.
In Griecheland ganz eisig kalt,
gibt’s Ouzo satt fer jung un alt.
Doch ich, ich such mer ebbes annres aus!
Bringscht mer en große Rieslingschorle!
En Schorle in Nullfünf, des is jo klar.
Vier Finger bräät, im Schoppeglas mit Dubbe.
kä Ferz debei un sunscht a känn Trara.
In Pole un in Russland trinkt ma Vodka,
der halt Dich a im Winter wach un warm.
Uf Malle gibt’s aus Ämer de Sangria,
Des is ganz sicherlich a net moin Draam.
In England wär mer’s Bier zu schal,
känn Schaum, des is e schlechti Wahl.
Un ganz bestimmt hänn die känn gude Woi!
In Japan do gibts Woi aus Reis
Doch frog ich mich, was soll der ...?
Fer mich, derf’s ebbes annres soi!
REFRAIN
Viel gute Sache gibt’s ach in Italie,
en Grabba fer de Babba, des is foi.
Moi Schwäche dort sin awer die Fressalie,
am End vum Dag basst äfach nix mehr noi.
Ich hab mich wirklich nie geziert,
mol do un a mol dort prowiert.
Un immer wieder kumm ich zu dem Schluss:
Dehäm bei uns im Pälzerland,
es beschd Getränk in moinre Hand:
Rieslingschorle! Des is moin Genuss!